كتير اتكلمنا عن ضعفنا " العرب والمسلمين والمصريين"، كتير اتكلمنا عن كلمة مش قادر، مش عايز، مش هقدر، أو أكتر كلمة دارجة مثلا ماليش فيه، كتير أوى بنسمع مش قادر أذاكر، مش قادر أذاكر، مش قادر أفكر، أنا أضعف من إنى أكون كذا، طب حد هييجى قولى إن ربنا خلق الإنسان من ضعف ودا مذكور فى القرآن مثلا، بس ساعتها هرد عليه وأقوله ربنا برضه ذكر إن عباده المؤمنين إنهم " أولى بأس شديد"، بس الفكرة إن الضعف هنا معناه إن الإنسان ما يتغرش فى نفسه وإن مهما راح ولا جه إنسان اتخلق من طين، وهييجى فى يوم هيرجع لربنا اللى خلقه مفيش مفر من دا، بس دا مش معناه إن الواحد يعقد حاطط إيده على خده ويوقل أنا مش قادر، ومش عايز، ناس تيجى تقولى يا عم ربنا قال " لايكلف الله نفسا إلا وسعها" طبعا ربنا ما بيحملش نفس أكتر مما تحتمل، بس هو سؤال إنت إو إنتى عرفت/عرفتى منين إن قدرتك واقفة عند الحد دا مش هتقدر تأدى بعديه، مشكلتنا إننا بنوطى سقف قدرتنا جدا، فبنرسل رسائل سلبية لعقولنا إننا ما نقدرش، طب جرب كده تقول لنفسك أنا قوى وهغير نفسى كده أكتر من مرة وشوف هيحصلك إيه وقولى، ارفع سقف أحلامك، ارفع سقف قدراتك على قد ما ربنا يقدرك مش على قد ما إنت تقدر عشان فى فرق كبير، ربنا هو اللى هيخليك تحس إنك كده آخرك لكن مش إنت، بس الفكرة إنت لما هترفع سقف أحلامك وقدراتك هتلاقى إن قدرتك على العطاء زادت، قدرتك على التركيز زادت أكتر، بقيت متفائل أكتر، على فكرة التفاؤل دا شئ مهم جدا، مش بقولك تمشى ترقص فى الشارع، بس تفاءل، النهاردة اللى لونه اسود فى حياتك بكرة تلاقيه بقى أبيض وألوان كمان
طب وطريقة دا إيه؟ ارفع السقف على قد ما ربنا يقدرك، افضل طول ما إنت فيك نفس ارفع، ما تخليش حاجة تحبطك، ما تخليش نفسك الأمارة بالسوء أو جانب الشر فيك يسيطر عليك ويقولك فكك، لما هترفع سقفك ضميرك هيصحى من النوم اللى هو فيه، هيقول أنا عايز وعايز وعايز مش شرط حاجات مادية تتلمس حتى لو كانت حاجات معنوية صعب الإنسان يشوفها، حتى لو حاجات تتحس
طب وإيه حكاية الإرادة؟ الإرادة هى اللى بنسمع عنها بقى كلمة مش عايز، ماليش نفس، نفسى مزدودة، أو مش عايز عشان ما اتإذيش مثلا، كلمة مش عايز دى خطر جدا، لأنك لو سقف قدراتك عالى من كتر ما هتقول مش عايز هتلاقيه بينزل معاك، ولو بصيت على حالنا النهاردة هتلاقى مش بس الناس فى الشارع والحكام كمان اللى بإيدهم السلطة والنفوذ والمال، أهو قدرة أهو، بس مفيش إرادة، عندهم نقص فى قوة الإرادة، القدرة من غير الإرادة ما تقدرش تعمل بيها حاجة، بس لو عندك إرادة ممكن تقدر تجيب القدرة، شوفت بقى دى، الإرادة هى اللى تخليك تقول لأ بثقة وإنت مش خايف من حاجة، قوة الإرادة هى اللى تخليك تقرر القرارات فى حياتك من غير ما تتردد ولا ثانية واحدة، ومستعد لتحمل عواقب اختياراتك، إحنا فين النهاردة من قوة الإرادة؟ الناس النهاردة بتقولك عشان نصلح إحنا عايزين معجزة، أنا بقولهم لأ لأ لأ، إحنا محتاجين قوة إرادة، وقدرة وعقول متفتحة، ونفوس سليمة، وأرواح متفائلة إن مجهودها اللى هتبذله مش هيروح هباء منثورا
طب والقوة أخبارها إيه؟ ناس كتير ممكن لما أقول كده تفتكر العضلات بقى والمجانص والحاجات دى، بس هنا أنا أقصد المعنى اللى بيكمل اللى قولته قبل كده، قوة الإرادة والقدرة، قوة بمعنى إنى أقدر، وعايز وأمتلك ما يكفى من الامكانيات إنى أحقق اللى أنا عايزه وأحلامى، أكيد الموضوع مش سهل أوى، بس يا جماعة لهو صعب ولا مستحيل، بس ممكن تقول عليه كده سهل ممتنع، زى ما إنت قادر تنزل السينما وتخرج مع البنات زى ما تحب، وتروح حفلة مش عارف مين ومين، ما تقعد ذاكر، اعمل شغلك على أكمل وجه، فكر فى حال أسرتك، وأهلك، وبلدك، انزل الشارع اتأمل أطفال الشوارع مثلا وفكر فى حل ليها، إيه دا يعنى مثلا أنا ممكن أحل مشكلة زى دى؟ أه ممكن ليه تقلل من نفسك، بس إوعى تتغر
ورسالة بقى أخيرا بما إن المدونة بتقول أنا م البلد دى و أنا فخور إنى مصرى، رسالة لمصر والمصريين، اللى عايز معجزة يبص للمصرى وتاريخ هيعرف إن المعجزة الحقيقة هى قوة إرادة الشعب دا اللى أبهر العالم كله فى مواقف كتير أوى على مر التاريخ، وبيقوله إن التاريخ ممكن يعيد نفسه، طب ما تيجى نفكر نقدر نرجع معجزة الشعب المصرى الأصيل ولا لأ؟ على رأى واحد صاحبنا اسمه عبدو ابن خلدون أكيد نقدر:) عشان بلدنا مصر، ودا اختبار لكل إنسان بيحب تراب البلد دى هتقدر توفى بحبك ليها ولا لأ؟ يلا تعالا نشوف مين اللى يسبق. ومهما فيه صعوبات وفيه مشاكل ولو حتى طباع الناس اتغيرت هرجع وأقولك، هييجى يوم ومصر ترجع لينا ونرجع ليها وقريب، بس تعالا نقول أكيد نقدر:)
