"هى دى مصر يا بهية.....1"

هارونا زمان فى المدارس تربية وطنية وكان مقرر تقيل جدا وكان المفروض يتحفظ صم وحتى مش المفروض نفهم بناخده ليه، طيب سيبنا من المدرسة تعالوا بقى للشارع والواقع المصرى وأماكن أنا ياما قضيت فيها أوقات فى حياتى كتير، تعالوا بينا على بعد 20 كيلو متر من القاهرة وإنت رايح اسكندرية عروسة البحر الأبيض المتوسط وبص على إيدك اليمين كده، المكان دا زمان كان صحراء طبيعية مكانش فيها أى نوع من أنواع الحياة تماما، أينعم دا مش كويس أوى اللى حصل فيها مكانش أحسن أوى من اللى كان موجود، هتلاقى على يمينك محطات بنزين، ماشى عديها ولا يهمك مش مشكلة، خلينا فى الحاجات الجميلة اللى قبليها منطقة سفارى و المطاعم والكافيهات الجميلة اللى مليانة شباب زى الورد ومش بس المنطقة دى على فكرة كمان ملايين الكافيهات فى المهندسين والزمالك ومدينة نصر وحتت كتير فى مصر وحتى كمان فى القرى و فى الصعيد مبقتش حتى القهوة البسيطة بتاعت زمان،ده كده بس بشكل مبسط ومبدئى وعشان عايز أقول إن العنوان المقالة "هى دى مصر يا بهية...1"هو بداية لسلسلة مقالات لحال مصر وفى المقالة أنا عايز أبين وأوريكم بالبلدى كده حال شباب مصر المتعلم واللى معاه فلوس وأهله مدلعينه ومروقينه آخر روقان أو بالاختصار شاب الطبقة الارستقراطية أو الطبقة العليا والناس الهاى زى ما بيقولوا،

الأول تعالوا نشوف المكان عامل سواء كانت قهوة بلدى أو كوفى شوب أفرنجى، أصله كمان فى أنواع يا فرحتى ،وإنت داخل برجلك اليمين وبتسمى بالله تلاقى سحابة بيضاء من الروائح الغريبة والمتنوعة إشى كنتلوب وإشى فراولة وإشى لمون ونعناع وإشى تفاح وإشى معسل وإشى فواكه من كل نوع وريحة و تلاقى الأماكن دى سهرانة صباحى، ضيق أو واسع بقى مش دا المهم، المهم اللى بيحصل فيه أشكال غريبة وعجيبة من البنى آدمين فى لحظة ممكن تحس إنك مش فى مصر وتقول مش دى مصر اللى ربنا ذكرها فى القرآن حوالى 6 مرات تلاقى الواد قاعد واللى لامؤاخذة البوكسر باين وزى الفل وحاجة آخر حلاوة وتلاقيه مسقط البنطلون تيجى تقوله طب إنت عامل كده ليه يقولك موضة بقى وكل الشباب عامل كده اشمعنى أنا، طيب وتلاقى شعره عامل زى فروة الخروف تحس إنه مكسل يروح عند الحلاق أو مش بيستحمى مثلا،يعنى حاجة زى كده وتلاقى حتى الملامح تحس إنه بيشرب حاجة، بيتعاطى حاجة يعنى مش مضبوط، أما المواضيع اللى بيتكلم فيها مع أصحابه لو كانوا ولاد بس إما بيتكلموا فى الكورة أو عن الممثلين والمغنيين ومهتمين بيحياتهم الشخصية تقولش مثلا من أحد مقدسات الوطنية أو يقعدوا يتفرجوا على ماتش ويبقوا متعصبين أوى تحس إنه هيقوم يضرب اللعيبة ولا حاجة أو مثلا بقى يقعدوا يبصوا على البنات الشابات ويتلفظوا بألفاظ وغريبة وقبيحة أو بمعنى أدق بيبصبصوا تلاقى الواد من دول قاعد ماسك الشيشة فى إيد والسجارة فى إيد وقاعد باشا والمفروض إنه متعلم بس لو سألتوا فى أى حاجة مثلا فى بلده حتى المعلومات العامة هتلاقى الرد مثلا يقولك " والله معرفش... أصلى مش متابع " أو يقولك "ياعم كبر ومطيرليش الدماغ اللى أنا عاملها....فكك منى بقى"، وتلاقى دماغه مش هنا ويا سلام بقى لو القاعدة فيها بنات شابات زى الورد طبعا تبقى أحلى كتير وتلاقى حاجات غريبة بتحصل، تلاقى مش عارف مين فى حضن مين وبيقعدوا بيضحكوا تلاقى الضحكة واصلة لآخر الشارع وتلاقيها ضحكة البنت لأ فعلا بنات محترمين وعندهم حياء؟!، وتلاقى بقى المنظر دا مش فى القاهرة بس وتلاقى فى كل حتة وخاصة بقى يحلو فى المصايف والذى منه، ويا سلام لما تبقى القاعدة فى مارينا حيث عالية القوم والناس اللى فوق واللى مفيش منهم تحت ولا مؤاخذة وتلاقى هناك كل ما تشتهيه الأنفس وتلذ الأعين و فيها ما لا عين رأت ولا أّذن سمعت كلام قبيح زى العسل و تلاقى الواد ماشى مع البت ماشية مش عاطفية بالمرة ويقولك صاحبتى و متفهمش صاحبته ولا حبيبته ولا خطيبته لأنه فى المناخ دا التلاتة بيعملوا ننفس الحاجة وتلاقى بسم الله ما شاء الله الخمر شغال على ودنه والحشيش والمخدرات وكل ما هو يذهب العقل و تلاقى الزنا برضه شغال زى الفل ما تعرفش مين فى حضن مين ولا مين مرات مين "على كل لون يا باطسطا"، وفى هم دول ولاد الناس فى نظر القانون والدستور المصرى وبل والحكومة المصرية الموقرة.

طيب دلوقتى فى حاجة هل الشباب دا اتولد كده بالمنظر يعنى اللى بيشرب شيشة دا وسجاير وعمال يحرق فى نفسه فى اللى حواليه دا يعنى نازل من بطن امه ماسك شيشة ولا نازل بسيجارة فى بقه، طب والبنت اللى بتبقى لابسة محزق و ضيق وساعات ممكن تحس إنها معندهاش هدوم دى عاملة كده ليه؟! طب أنا طبعا هقول اللى أنا شايفه ووجهة نظرى قابلة للرفض قبل القبول و قابلة للتعديل و التغيير وأبقى سعيد لو الناس شاركتنى وجهة النظر دى، هو أنا دلوقتى أنا بشوف أى حاجة عايز أدرسها زى الظاهرة مش بحاول أطلع حد بعينه هو اللى غلطان لأن بيبقى الغلط نابع من أطراف كتير و متعددة فمقدرش أقول فلان دا هو اللى غلطان لوحده لكن أقدر أقول، أولا بداية فتح كلام تربية فى البيت متلاقيش الواد أو البنت من دول تلاقيها مربياها الشغالة والأم سيدة أعمال مش فاضية للتربية والكلام الفاضى دا و الأب رجل أعمال عمال طول عمره يجمع فى فلوس عشان يقولك بأمن مستقبل ولادى وولاده مستقبلهم فعلا تلاقيه متأمن فى الصياعة فى الكباريهات و الملاهى الليلية والكافيهات و العربيات الفارهة الآخر موديل و تقوله ليه يا عم الحج يقولك " أنا فلان بن فلان ابنى يركب عربية يابانى أو كورى أى كلام" وفى الآخر تلاقى العربية مخبوطة بعديها بكام يوم " أصل يا بابى كنت بشد مع أصحابى فخبط العربية" وتلاقى العربية مثلا كانت بورشه ولا لامبورجينى يقول الأب الوقر المحترم يقوله" طيب أنا هخليك تركب بى إم زى أى كلب فى الشارع" فأصبحت حتى البى إم عربية بيئة، تيجى تسأل الأب دا طب إنت علمته إزاى يصلى إزاى يبقى بنى آدم محترم عنده أخلاق، يقولك ما أنا متغرب و بسافر وبجيب فلوس عشان أامنله مستقبله وهو مش عارف إنه ضيع عمره عشان يضيعله مستقبلهو يفتكر عشان هو عارف يجيب لإبنه كل حاجة إنه خلاص كده الدنيا فل و عسل ومفيش أى مشاكل والواد متهنى، و لما يكتشف إن الواد ضايع يرمى الغلط على الحرم المصون تقولك" ما أنا كمان مكنتش فاضية عشان الجمعيات الخيرية اللى أنا بعملها عشان أفيد المجتمع زائد المشاريع اللى بعملها" وتلاقيها ولا بتخدم ولا نيلة وتلاقى الجمعيات الخيرية دى منظر بس، فأصبحت الطبقة العليا ملغمة برجال الأعمال وسيدات الأعمال اللى ولادهم بيشعروا فى لحظة إنهم ممكن يعملوا أى حاجة وكل حاجة من غير ما حد يعاقبهم أو يقولهم دا غلط أو حرام، طيب دا جانب

جانب تانى وهى منظومة التعليم المتخلفة اللى بقت شر لابد منه بدل ما كانت خير لابد منه بعد ما اتحول التعليم عملية تلقينية بحتة بدون أى فهم أو تشغيل مخ وبدون أى هدف او بالبلدى كده" احفظ ودش وخش دب الكلام فى الورقة فى الآخر" طب وبعد الامتحان ولا استفاد أى وكأنه ولا دخل مدارس ولا اتعلم، أصل فى حاجة المسؤولين عن التعليم فى مصر مش واخدين بالهم منها هى إن التعليم حاجة و الوعى حاجة و التعليم من الأجل الاستثمار وجلب المال حاجة و التعليم من أجل الوعى بقضايا الوطن و من أجل التربية والنشئ السليم حاجة، يا نهار ألوان حتى البيزبس دخل فى التعليم كمان؟!، أيوة دخل فى كل حاجة حتى أفقد معنى وقيمة العملية التعليمية كما أفقد قيمة ومعنى العملية التربوية، و أكتر دليل على الكلام الثانوية العامة المخيفة البعبع اللى الناس كلها بتخاف منه، وفى الآخر يجيب مجموع يخش كلية قمة ويطلع يقعد على القهوة، أو ما يجبش مجموع ويخش كلية خاصة ويطلع يقعد على القهوة، وتسأل الشاب منهم طب إنت اتعلمت تحب مصر بلدك اللى اتولدت فيها وعشت فيها طول حياتك، يبقى منشتكيش من عدم الانتماء، الانتماء اللى المفروض المدرسة وأجهزة التربية التعليم والحكومة والبيت يغرسه فى النشئ من الأول،
جانب كمان إزاى شاب زى دا عمال يشوف البلد و الحكومة اللى حاطه الدستور مش بتحترمه برضه حاجة بتأثر فى موضوع الانتماء خصوصا أما يحس إن البلد هى مملكته و ليست وطنه فى فرق، المملكة ممكن تباع وتشترى إنما الوطن أسمى من أن يباع ويشترى،" أصلها بلد اللى خلفوهم" ،

جانب كمان الثقافة السائدة بين شباب الطبقة العليا اللى بتتمثل فى التكبر والغرور على أبناء مصر البسطاء اللى عايشين فى كل حتة ويقولك دول مش مصريين إحنا اللى مصريين وإحنا اللى بنمثل البلد، بس هم مش عارفين إن مصر مش بس رجال الأعمال اللى زى ما فى منهم كويسين قليلين ويتعدوا على الصوابع فى منهم واللى أكترهم فسدة وبايظين وماشيين ورا مصالحهم وتولع البلد باللى فيها وتلاقى الشاب مش مهتم فعلا ويقولك وأنا مالى يكش تولع عشان هو مطمن إنه لو حصل حاجة بابى ومامى هيحموه ويهربوا على أول طيارة خاصة بيهم ويروحوا أى حتة فى العالم يكملوا فيها حياة الرفاهية الزيادة عن اللزوم و تفقع دى، ثقافة انعدام الإحساس بالمتغيرات و الحياة اللى حواليه الشاب من دول مش همه غير نفسه ومزاجه وللأسف بقولها وأنا متحمل مسئولية كلامى الشاب دا مش هو الغلطان لوحده وبذرة الغلط مش من عنده، بس البيت والمناخ و الحكومة اللى مش بتدافع غير على رجال الأعمال لحد أما بقت مملكتهم الحرة بتصرفوا فيها و فى أقدار الشعب دا كما يشاءوا، دا غير مفهوم الطبقة الاجتماعية عندهم مختلف لأنه بيشوف كل من هو أقل منه باحتقار فى حين إنه ممكن يكون معهوش فلوس وأبوه مش وزير ولا رجل أعمال بس عنده أصل=أخلاق، وبيحب مصر وبيعمل عشانها،

طبعا الدنيا مش ضلمة بس هى فعلا وحشة لأن الشباب الكويسين تلاقى أغلبهم من الطبقة المتوسطة وقليل أما تلاقى من الهاى كلاس،
أنا عايز أقول فى آخر المقالة دى فى الجزء دا إن دا أهو جزء من مصر و الشباب دول مصريين ولكن مصريين إزاى الاسم و لا العمل والشخصية والكيان والإنسان، على رأى واحد صاحبنا مصرى البلد ولا المحطة، أنا مش هسيب الدنيا سودا أنا نسيت أقول إن فى آخر السلسلة هحط حبة حلول لكل دا بس أنا فى الأول برصد وبحلل مصر النهاردة عامله إزاى وفين أولادها، المرة الجاية هنتناول المناخ العام للطبقة العليا بعيدا عن شبابها، مناخ المسكن والملبس والكماليات والرفاهية و الفوارق الاجتماعية وكل الكلام الجميل دا، وعايزكم معايا كده نفكر من هو المصرى؟ ودا سؤال مفتوح و مستنى زيارتكم تنوروا فى أى وقت فى مدونة أنا م البلد دى.....

مواطن مصرى بسيط