طب و هنعمل إيه

أولا قبل أى كلام أنا بعتذر عن التأخير اللى أنا اتأخرته فى كتابة أى حاجة أو الرد على تعليقات الناس ولكن مش على طول حياة البنى آدم وردية بتمر بيه لحظات ضعف ولحظات اكتئاب، ولكن بتعدى عشان لازم تعدى، ثانيا أتمنى تكونوا كلكم كويسين وسعداء يارب، ثالثا أنا راجع أكتب وكلى حماس إن ممكن تبقى المدونة دى ينطلق منها إرادة النهوض بمصرنا الحبيبة.
المرة دى عايز أكتب عن بعض الخطوط العامة كده بعد ما كئبتكم بحال مصر وحالنا بس هل معنى كل اللى أنا رصدته مفيش أمل تانى إن بلدنا تبقى أحسن أو إننا ناخد بإيدها لبر الأمان من تانى، وفى زميلة أو زميل كان وكانت علقت وطلبت منى أقولها تعمل إيه عشان مصر، طبعا هو أنا أصغر من إنى أقول نعمل إيه لمصر لوحدى، ولكن ممكن نفكر كلنا سوى ونبتدى نحلم بالنهضة و نحلم بإن مصر لازم يكون ليها حلمها الخاص بيها مش جزء من حلم أمم تانية أو دول تانية ملهاش أى علاقة بينا وأهدافها ومصالحها بعيدة عننا خالص، وثقافتنا غير ثقافتهم وحياتنا غير حياتهم.
طب إحنا محتاجين كلام كتير بس إحنا ممكن ناخدها واحدة واحدة لأننا مش هنلم كل حاجة من تدوينة واحدة دا غير إنى مش هتكلم لوحدى لأن دى بلدنا كلنا واللى عارف المدونة وبيعرف حد قلبه ع البلد يخش يتكلم معانا محتاجين دلوقتى نحط إيدينا فى إيد بعض عشان ننهض ببلدنا قبل ما نوصل للقاع اكتر من كده.
ومن هنا عايز أبتدى أول حاجة وهى حاجة تبدو بسيطة ولكن ما بناخدش بالنا منها، وهى نبتدى بنفسنا، فى سلبية رهيبة جدا موجودة فينا كلنا، تلاقى حد يقولك إيه" هو دا الشعب المصرى: شعب مش عارف تصرفاته عاملة إزاى" هو لمؤاخذة اللى بيتكلم دا منين هو مش مصرى يعنى، أول حاجة من وجهة نظرى إن إحنا وإحنا بنتكلم نتكلم بصيغة الجمع وليس بضمير غائب أو متكلم، الضمير اللى مسموح بيه هو الجمع عشان كلنا مسئولين ع اللى بيحصل، صحيح فى مننا اللى بيحاول يحسن مش بقول إن كل الناس وحشة بس حتى لو إنت كويس إن فى الآخر" مصرى" هتلاقى فى شخصيتك ولو حتى سلبية واحدة ع الأقل من سلبياتنا كلنا لأننا مصريين كلنا مع بعض دى أول طريقة حل أى مشكلة فى البداية و هى الاعتراف بالمشكلة على حجمها لا أكبر ولا أصغر من حجمها.
آخر حاجة هقولها المرة دى بس عشان ما أبقاش تقيل عليكم بعد طول المدة دى، ابتدى بنفسك، عاند مع نفسك، مفيش حاجة اسمها لو خربانة تبقى كلها خربانة، فشلت فى حاجة مش نهاية الدنيا، الدنيا فى بلدنا بايظة برض مش نهاية الدنيا ابتدى بنفسك، خليك جوة نفسك إنت إيجابى قبل ما تطلب من الشعب المصرى اللى إنت أو إنتى منه يبقى إيجابى، خليك إنت إيجابى و الكلام ليا أنا كمان معاكم لو شوفت حاجة غيرها بأى طريقة، خليك إيجابى فى تفكيرك حتى لو فى أصغر وأقل حاجة فى حياتك، الكبير مش بيبتدى كبير بيبتدى من الصغير، لو الناس كلها مش بتحترم القانون احترم إنت القانون، لو الناس كلها بتشوف الغلط وتسكت إنت ما تسكتش، عاند مع نفسك فى النجاح بدل ما تعاند مع أهلك عشان تجيب الحاجة الفلانية أو تعمل الحاجة الفلانية، اعند مع نفسك أولى و أحسن كتير، صدقنى هتلاقى حياتك أحسن كتير، ولو جاللك إحساس بالإحباط قول لنفسك لا أنا هغير نفسى أنا كويس أنا هغير إوعى تسيب حد يحبطك بالمقولة المعروفة" غيرك ما عرفش يغير يعنى إنت اللى هتغير" أيوة إنت اللى هتغير مين عارف إنت هتبقى فى المستقبل، آخر حاجة هقولها يمكن تأثر فيك شوية الرسول صلى الله عليه وسلم قال " لا يكن أحدكم إمعة إن أحسن الناس أحسنتم و إن أساءوا أسأتم" وفى ما معنى باقى الحديث " ولكن إذا أحسن الناس أحسنت و إن أساءوا أحسنت" يلا يا جماعة تعالوا نلحق بلدنا لو فعلا بنحبها.